AN SAYO NGA LAVEZARESNON
September 23, 2009 by champoyupee
Carl Jamie Simple S. Bordeos
September 23, 2009
An sayo nga Lavezaresnon
Mahinigugmaon.
Mahinigugmaon
Sa iya Diyos
Sa natawhan o gindak-an na bongto
Sa iya pamilya ngan kaparyentehan
Sa iya kasangkayan
Ngan pati sa iba nga tawo maski dire niya kila.
Iton an sayo nga Lavezaresnon.
An mahinigugmaon mayda pagkahadok.
Sa Diyos na iya kinikila
Diyos na Makagarahum,
An ungod na Diyos, dire hinimo, dire tawo, dire kuwarta o kun nano pa man.
An mahinigugmaon matalahuron.
Matalahuron sa arog sa iya o mas bata pa sa iya.
Matalahuron sa iya kag-anak, kabugtuan, paryente ngan kasangkayan
Matalahuron sa balaod san bongto
Matalahuron maski sa katungod san iba: tawo, hayop, maski sa iya libong.
An matalahuron nasunod.
Maaram sumunod san balaod.
Maaram sumunod sa iya kag-anak.
Maaram sumunod san iya pagtoo ngan konsensya
Maaram sumunod san karuyag san kadam-an maski kontra pa san iya interes ngan karuyagon.
An masunodon napaubos.
Napaubos sa karuyag san Ginoo.
Napaubos sa karuyagon san katawhan
Napaubos ngan napasakop san iya konsensya.
An napaubos mabuot.
Buotan siya dire tungod kay dire siya nagliliya-liya
Buotan siya dire tungod nga dire siya maaram mag-ato sa iba
Buotan siya dire tungod kay sa pag-imod san iba mala-anghel siya
Buotan siya dire tungod kay damo an iya medalya sa Religion o GMRC na subjects
Lugod, buotan siya tungod kay siya nagliliya
Buotan siya, kay siya nagriribok
Buotan siya, kay siya natindog
Sa halipot na istorya, buotan talaga siya.
Naliya, naribok, natindog san iya gintotoohan.
Buotan siya kon maaram siya umato sadton mga tawo nga nagpapakatawo-tawo pero an batasan ngay-an kanan hayop.
Buotan siya kon maaram siya tumugbos kontra sadton samok an dara.
Buotan siya kon mayda siya konsensya.
An may konsensya
Dire nagpapakabuta-buta
Dire nagpapakabungol-bungol
Dire manhid
Labi na gud kon mayda siya naiimod na maraot ngan dire tama.
Maski ikamatay pa niya o kon nano pa man an mahinabo sa iya
Tungod san iya pagtindog, pagliya, pagribok ngan pagboses
Basta an aram niya ine na ginhimo niya
Para sa iya pamilya, kasangkayan, kaparyentehan, ngan an tanan upod na an bungto, ngan adto na masunod pa sa ira nga henerasyon nga magkamayda man unta sira mamurayaw, mas mauro-upay nga puruy-anan nga an ira gahoy, an hinigugma ko nga Lavezares.
An sayo nga Lavezaresnon
Dire kawatan
Dire gahaman
Dire hagas
Dire napagamit sa maraot an intensyon o interes
Lugod napagamit sa kaupayan.
Dire Kristiyano sa ngaran
Dire peke pero ungod na tawo
Dire nalilipay san pagkagana san karautan kontra sa kaupayan
Lugod pareho siya kan San Miguel na arkanghel nga dire natugot malabwan an kaupayan O kan Maria, simple, uray ngan mapainubsanon sa kaburut-on san Ginoo, iya Iroy
Para an hinigugma nga bungto, sugad kan Maria, makasakat sa langit san kamurayawan.
Isusugad ko sa iyo, para sa ako pag-imod,
Nga an sayo nga ungod nga Lavezaresnon
Mahinigugmaon.
Mahinigugmaon san Demokrasya.
