AN KAMATUORAN MAHIUNONG SAN DESISYON SAN COMELEC SECOND DIVISION Abyerto nga Surat ni Mayor Tingting Saludaga
Aug 29th, 2009 by champoyupee
Sa yana maaram ako nga gin uuy-og na kamo sin mga notisya mahiunong san desisyon san Comelec Second Division, Manila nga gin proproklamar na si Artemio Balag nga mao an nagdaog sadto nga nakaagi nga eleksyon petsa Mayo 14, 2007. Ine nga desisyon gin apirmar la an nakaagi nga desisyon ni Judge Eugenio dela Cruz nga aton gin habol tungod san deri tama nga mga datus nga mao an gin basaran san ira desisyon.
Nahitabo na liwat an paglakat san halaba nga kamot san poder san pulitika nga deri na nagkikita san kamatuoran ngan hustisya. Pero an kamatuoran deri matatahuban bisan nano paglimbong ngan pag-gamit san poder. Sugad san nahitabo san desisyon ni Judge dela Cruz, mayda liwat mga kwestyonable nga mga datus kon igkokompara san mga record san election return ngan san statement of votes nga may klaro nga dagdag-bawas. (Table not presented here)
Bale 135 nga botos an gin iban sa akon ngan 99 an gin dugang kan Titay Balag basar sine nga komparasyon, guwas la ine san gin papalabas nira nga nagdaya ako ngan an sobra 622 nga botos nga akon daug nga gin surat la kuno sin sayo ka tawo. Kun iibanon pa ine nga 622 sa akon sugad san ira karuyag mahitabo, gana pa gihapon ako sa bilang kun igkokonsiderar ini nga mga botos nga gin iban sa akon ug gin dagdag sa akon pangontra. Kun susumahon ngatanan, gana pa ako sin 156 BOTOS bisan pa upod an ira pandaya.
Kamo an labi nga maaram kon nano an nahitabo san eleksyon. Maaram kam kon nano an mga panghitabo san eleksyon kay kamo an nagbabantay san iyo mga botos. Deri naton liwat matatawaran an integridad san Municipal Board of Canvassers nga mao an nagtally san botos sa mga presinto kon diin ginuwas an election returns.
Diri ak matugot nga pagbale waraon an iyo mga botos ngan san iyo pagtapud sa akon hangtud mayda pa ako nabibilin nga kusog. Akon ini ig aato bisan diin nga korte ngan legal nga pakig-away.
Pero an akon pangiwaso matutugwayan la san iyo mga pag-ampo ngan pagsarig sa kamatuoran. “An Kamatuoran mao an makatalwas sa aton” pero an kinawat nga hustisya diri basta basta maibabalik sa aton kon diri ta pangiwasu-an.
Adi pa sa aton likod an Makagarahum kaya paglalauman ta nga umigbaw an katadungan kon kita nakakasarayo.
Tindog ngan ato kita ngatanan!
An iyo mayor,
(Sgd.) TINGTING SALUDAGA
